Pa shete dékada, Partido Demokrátiko Boneriano ta luchando inkansabelmente pa dignidat i bienestar di nos pueblo. Komo un partido Sosial Demókrata, semper nos a tene nos mes na e balornan ku a guia nos for di kuminsamentu. Sea nos tabata den gobièrnu òf den oposishon, Partido Demokrátiko Boneriano semper a para banda di esnan ku mas mester di yudansa, garantisando ku niun hende no ta keda atras.
Awe, miéntras nos ta para fuerte den gobièrnu, e frutanan di nos perseveransia ta kuminsá aparesé. Kambio nunka ta fásil I no semper ta bini lihé. Pero awor nos ta mira e simianan ku nos a planta kuminsá germiná, guiá pa e prinsipionan ku semper a definí nos.
Nos ta mira bèk riba un herensia di logronan remarkabel, manera introdukshon di penshun (AOV), pa asina nos grandinan, ku a duna asina hopi, por disfrutá. Partido Demokrátiko Boneriano semper a kere den forsa i potensial di nos mes hendenan. Nos a traha inkansabelmente pa trese nos hendenan bèk Boneiru, pa nan por yena ròlnan klave, pa asina tin kontinuidat i progreso, no solamente den gobièrnu, pero den tur huki di nos komunidat.
Nos ta sigui ku e lucha i ku e ideologia, ku nos a heredá di baluartenan ku a lanta e partido, pa un dia tur habitante di e baranka aki tin un kalidat di bida hustu i duradero. E antorcha di Partido Demokrátiko Boneriano ta sende briante pa 70 aña kaba, simbolisando nos lucha sin stòp pa un mihó Boneiru. Nos lo no kansa nunka, i nos lo sigui traha ku henter nos kurason pa bienestar di nos pueblo.
Pa honra e aniversario aki, direktiva di partido Demokrat, manera kustumber, tin un momento pa pone krans na busto di Julio (Jul) Abraham, na entrada di Rincon (orario:18:30). Despues lo tin spich di direktiva i tambe di lider polítiko, Clark Abraham. Ta sigui despues ku un Santu sakrifisio di Misa na Rincon (Parokia San Luis Beltran – orario: 20:00), i lo sera e anochi ku un bríndis na Tia Sáni.
.png)
Comments