Djaweps último 9 di novèmber 23 partisipante entusiasmá a finalisá e treinen di ‘Bonaire in Depth and Guiding Skills’ na FORMA. Ku e prestashon akí awor akí nan ta ofisialmente rekonosé komo guia turístiko di Boneiru i nan ta kla pa laga turista mira tur kos di Boneiru.
Sue Felix i Brian Albus, dos guia ku hopi eksperensia, a duna e treinen. Tabata un treinen intensivo ku 22 lès. Esaki a enserá tantu seshon den klas komo ekskurshon práktiko, entre otro kaminata i tour riba nos isla, kaminda e partisipantenan mesora por a apliká e konosementu ku nan a kaba di atkerí. E studiantenan a siña hopi tokante Boneiru, manera nos historia, nos kultura i nos naturalesa.
Sue Felix a kompartí su orguyo tokante e grupo grandi di studiante: ‘Ta trata di un kurso ku hopi desafio i yen di informashon tokante nos bunita isla. Nos aspirashon ta pa proveé e turistanan ku konosementu amplio tokante nos historia, kultura i naturalesa riku.’
Riba dia di klousura di e treinen, e kursistanan ku a slag a risibí nan sertifikado bon meresí durante un seremonia. Remarkabel tabata ku 50% di e partisipantenan a logra un skor di entre 90 i 100%, miéntras ku e otro mitar a realisá skornan di entre 80 i 90% - un testimonio di nan trabou duru i nan dedikashon.
Representantenan di Tourism Corporation Bonaire (TCB) i entidat públiko Boneiru tabata presente na e seremonia. Nan a felisitá e partisipantenan i gradisí nan pa a sigui e kurso importante akí. Miles Mercera, direktor di TCB, a konta kon importante e guianan nobo akí ta, prinsipalmente pa e turistanan ku no tin muchu tempu na nos isla.
Di e 23 partisipantenan, 12 tabata habitante lokal. Clark Abraham, diputado di turismo i ekonomia a ekspresá su orguyo tokante e grupo akí: ‘Ta fantástiko ku nos por ofresé partisipantenan lokal e oportunidat akí. Nan ta e mihónan pa traspasá nos kultura úniko i outéntiko pa turista. Nos ta spera ku esaki lo brinda nan hopi prosperidat.’
E grupo nobo di guia turístiko akí ta kla pa ofresé bishitantenan di Boneiru un eksperensia inolvidabel i outéntiko i di e manera akí aportá na e sektor turístiko floresiente di nos isla.
BròKèS 93.5 ………… Skuch’é!
.png)
Comments