Presidente di Asosashon di Empresarionan Chikí di Kòrsou ADECK, Gabriël ‘Boy’ Magdalena a risibí resientemente e di 4 buki di Feng Shui na papiamentu skibí pa konosedó, konsehero i outor Reyna Joe.
E buki nobo ta pa aña 2024 ku ta Aña di Dragon Bèrdè i ta pa tur hende ku ke usa e konosementu antiguo aki pa nan mehorá nan bida òf pa mantené e bon bida ku tin, sin importá na unda ta pará aworaki den bida.
Sigur empresarionan ta benefisiá di e konosementu antiguo aki ku ta duna no solamente guia pa kon organisá bo negoshi, pero tambe pa sa ki momentu òf nò tuma desishonnan impaktante pa futuro di e negoshi.
E buki aki ta un hèrmènt informativo pa tur hende ku ke ta importante i ku ke sa kon atendé ku éksito i áreanan den nan bida kualnan ta outoridat, fama i bon nòmber, amor i romanse, bon yu i kreatividat, biahamentu i hende pa yudabu, entrada stabil ku un trabou, sabidoria i inteligensia, salú i hopi plaka.
I e ta di balor tambe pa studiantenan i hendenan ku ta bai konstruí un edifisio.
Usadónan ta haña banda di informashon general tambe datonan spesífiko pa por plania aña i bida, usando splikashon detayá di e diferente energianan ku tei.
Anteriormente kaba Reyna Joe a skibi buki pa aña 2023 ku ta Aña di Konènchi di Awa, 2022 ku tabata Aña di Tiger di Awa i 2021 ku tabata Aña di Toro di Oro.
E añanan ta indiká segun signonan den astrologia chines i elementonan usá den Feng Shui.
Feng Shui ta e filosofia di bida antiguo asiátiko ku tabata usá pa siglonan pa emperadornan chines keda na poder i ku te ainda ta un konosementu usá pa hendenan rònt mundu den posishonnan di poder.
Por haña e buki ‘Dragon Bèrdè’ via 5612818.
BròKèS 93.5 ………… Skuch’é!
.png)
Comments