DCNA I FUNDACION PARKE NACIONAL ARUBA A ORGANISÁ TAYER NA ARUBA TOKANTE MANEHO MARINO

DUTCH CARIBBEAN NATURE ALLIANCE (DCNA) I FUNDACION PARKE NACIONAL ARUBA (FPNA) A ORGANISÁ TAYER NA ARUBA TOKANTE MANEHO MARINO

For di 21 te ku 23 di novèmber 2022 Dutch Caribbean Nature Alliance (DCNA) huntu ku Fundacion Parke Nacional Aruba (FPNA) a organisá un tayer na Aruba tokante Maneho Marino. Delegashonnan di tantu gobièrnunan komo organisashonnan di maneho di parke ku ta representá e islanan den Karibe Hulandes, a bini huntu pa un debate profundo tokante kon por atendé ku e desafionan úniko ku nos islanan ta konfrontá den kaso di protekshon di oséano. Ta promé biaha ku ta organisá un semehante tayer pa Hulanda Karibense.

Na komienso di e tayer ekspertonan invitá for di Oustralia, Jamaica, Reino Uní, Colombia, Merka i Aruba a presentá vários ehèmpel di ‘best practices’ i aserkamentu inovativo di protekshon di oséano prosedente di tur parti di mundu, ku nan ta usa den kaso di ehersisio pa solushoná problema i diskushon di mesa rondó tokante un meskla di tópiko, manera maneho di parke marino, maneho sostenibel di piskamentu, supervishon i mantenshon di lei riba laman, turismo sostenibel i inventarisashon di stakeholdernan stratégiko. Minister Ursell Arends, minister di Integridat, Transporte, Naturalesa i Asuntunan di Adulto Mayor pa gobièrnu di Aruba, a habri e tayer i a duna un diskripshon di e agènda ambisioso ku Aruba tin pa preservashon di laman, entre otro un parke marino rònt di e isla.

Minister Ursell Arends: ‘Pa hopi aña kaba Aruba ta pone nos prosperidat ekonómiko na promé lugá, a kosto di nos naturalesa. Nos ambishon ta pa ekspandé e parke marino aktual ku kuater área pa logra un parke marino rònt di henter nos isla komo parti di un meta mas grandi pa e Plan Espasial Marino final di Aruba. Na lugá di prohibí aktividat, e modelo di parke marino rònt di nos isla lo krea un plan pa un ekilibrio duradero entre aktividatnan humano i ekonómiko den nos espasio marítimo i preservashon di bida bou di laman.’

Komo parti di e tayer a invitá e partisipantenan pa hasi un kaminata den Parke Nacional Arikok pa haña sa mas tokante e variedat di flora i founa di Aruba. E kaminata akí a rekordá tur hende dikon ta esensial pa protehá naturalesa i a duna FPNA e oportunidat tambe pa mustra e trabou importante ku e tim ta hasi pa protehá i preservá naturalesa na Aruba.

‘Nos a sinti nos honrá pa traha huntu ku DCNA pa organisá e tayer di Maneho Marino na Aruba i yama bon biní na e stakeholdernan i ekspertonan internashonal importante pa kompartí konosementu i ekspertisio tokante maneho marino ku e representantenan di e diferente islanan’, segun Natasha Silva, Chief Conservation Officer di FPNA. Awor akí mas ku nunka nos oséanonan ta bou di menasa serio, i for di e tayer a resultá ku nos tur tin plannan ambioso pa protehá i manehá e medio ambiente di nos isla i pafó di esaki. Kolaborashon riba nivel lokal i entre e islanan ta esensial na momentu di implementashon di aserkamentunan inovativo pa protehá nos oséanonan pa generashonnan di futuro.

Esaki ta e promé di un seri di tayer ku DCNA ke organisá den e añanan binidero, kada biaha na un otro isla, pero tur ku enfoke riba maneho sostenibel di rekursonan natural i protekshon di naturalesa. E laso di kolaborashon di Oceans5-financiers a spònser e tayer akí generosamente ku sosten di Blue Marine Foundation i Allen Institute for Artificial Intelligence.

‘Tabata fantástiko pa mira un diversidat asina grandi di partisipante kaminda tur tabata hopi entusiasmá pa traha huntu ku otro’, segun Irene Kingma, konsehero di maneho di DCNA. ‘Komo sekretariado di DCNA nos tin un ròl fasilitario den direkshon di nos miembronan, kaminda desaroyo di kapasidat i kompartimentu di konosementu ta para sentral.’

=========================================== BròKèS 93.5 ………… Skuch’é! https://www.radio935bonaire.com http://radio.garden/listen/bro-ke-s-93-5-fm-boneiru/a1YG6S77 https://www.basilachill.com/#!radio/radiobrokes http://brokes935fm.radiostream123.com https://liveonlineradio.net/radio-brokes-935-Radio