Den bario di Republiek e siman akí nan a topa ku e Giant African Land Snail (Lissachatina fulica). Departamento di Salubridat Públiko ta konfirmá esaki. Ta di promé biaha ku ofisialmente nan ta konfirmá presensia di e kokolishi akí na Boneiru.
Originalmente e kokolishi akí ta prosedente di Wèst Afrika, pero pa hopi aña kaba e ta aparesé den region karibense tambe, manera na nos isla besiña Kòrsou. E kokolishinan akí por a drenta Boneiru na diferente manera, por ehèmpel ku un kargashon di mata òf tera pa mata.
E espesie di kokolishi akí tin ora por tin un parásito huntu kuné ku por hasi hende malu. Pa e motibu akí Salubridat Públiko ta konsehá pa no mishi ku e kokolishi akí òf his’é ku man sin hantskun. Ora ku bo mishi ku e kokolishi bo por hiba e parásito, si e ta presente serka e kokolishi, via bo man na bo boka i di e manera akí e por hasi bo malu. P’esei den kaso di kontakto ku e kokolishi akí ta importante pa mesora laba bo mannan bon ku awa i habon.
Den naturalesa semper bakteria, vírùs i parásito por keda transmití via bestia i mata riba hende. Esaki por sosodé via kuminda tambe. Pa e motibu akí semper ta importante pa promé ku prepará kuminda laba man bon, laba bèrdura i fruta bon, herebé òf hasa karni sufisientemente i no mishi ku bestia di mondi, inkluso kokolishi, ku man sin hantskun.
Diferente departamento enbolbí di Entidat Públiko Boneiru ta monitoreando e situashon. Ora ku tin mas informashon tokante e kokolishi akí na Boneiru, nos lo anunsiá esaki.
===========================================
BròKèS 93.5 ………… Skuch’é!
.png)
Comments