Pa medio di e komunikado aki, e último parti di diskurso di Herbert Domacasse tené na resientemente na okashon di e evento yamá ‘Sa Mas di Nos Radio’ den kuadro di tres aniversario di emisora BròKèS 93.5 FM.
Na dicho okashon Sr. Domacasse tabata oradó invitá i a elaborá riba e tema ‘Konfiansa i Sosten’. Ya den un komunikado anterior nos a trese e promé parti di e diskurso i awor e último parti.
Den su diskurso Herbert Domacasse ta toka tambe e tema liderasgo, menshnando lo siguiente; Kòrda liderasgo no ta un kualidat pa sierto hende eskohí, semper abo mester aspirá pa e tipo di lider ku bo kier komprometé na bo metanan dor di kompartí bo mishon ku otronan i biba esaki tur momentu;
Den e organisashon BròKèS, nos ta konstatá tambe e echo importante ku Dios ta sentral i realisá ku aki mi no a menshoná ‘nòmber di misa, pero di Dios, nos Kreadó’,
kende su palabra ta bisa den manual ;(2cor ) “Pasobra maske nos ta kana den karni nos no ta batayá segun karni; Pasobra e armanan ku nos ta batayá kuné no ta karnal, ma poderoso den Dios pa basha e fòrtinan abou i pa destruí spekulashonan;’
Dios a krea e ser humano ku un nesesidat primordial, entre otro dignidat, outoridat, bendishon, seguridat, propósito, libertat, amor i intimidat, tur ta ingredientenan importante pa un ser humano aki por ta eksitoso den kiko ku e mishi kuné.
Naturalmente lo bo topa tambe ku preshon i desapunto pa kua bo mester ta bon prepará pa tuma posishon mesora i pa usa esaki komo lès di bida pa sigui hasi lo mihó. No opstante e preshon pa realisá bo soño, semper sigui e ruta di ta aktuando segun un moral haltu i un bon reputashon i komportashon.
Ami lo kier sigurá boso ku nos amigu Djòni sostené pa su esposa Ethel, tin tur e ingredientenan aki. Awor e mester di e apoyo, ‘konfiansa i sosten’ di boso kada unu, pa asina e radio por sigui bria na benefisio di henter nos komunidat, si di nos tur.
Djòni ta gusta sirbi, un persona humilde, atmití ora e ta fout i drecha esaki pa asina e por ekperensiá éksito. Solamente ku e aktitut aki Radio BròKèS 93.5 FM huntu ku Djòni i Ethel por ta eksitoso i awor ku a prepará e fundeshi, nan mester di boso ayudo i apoyo pa asina, nan na nan turno por ta un ayudo muchu mas efektivo den nos komunidat i mira fruta di tur nan trabou i esfuerso pa nos komunidat.
No lubidá! Ta solamente ku kurashi i perseveransia bo por manehá tur otro reto den bo bida. Ku e virtutnan aki di kurashi i determinashon e radio aki lo sigui ta eksitoso. Ku boso ayudo e lo keda hunga e ròl importante den nos komunidat i ku semper ta dispuesto pa move ku su klientenan;
Ku e aktitut aki e lo sigui krea e konfiansa tambe serka otronan, dor di;
Sigui trata sinsero i transparente tur hende en partikular oyente i kliente.
Envolvi mas hende den e proseso di tuma desishon.
Konektá hende ku e potrèt mas grandi, esta pa henter nos isla i no solamente pa un grupito.
Laga mundu sa ku e, Djòni huntu ku Ethel, ta pará pa e hende i ta apoyá nan.
Esaki ta Radio BròKèS 93.5 FM, esaki Dios kier di Djòni i Ethel i nan ta spera boso kompaño i ayudo pa sigui ta huntu i eksitoso riba e baranka aki.
Un lider konosí mundialmente John Maxwell a yega di bisa;
“E potenshal di un lider ta ser determiná dor di esun mas serka di dje”
Djòni i Ethel ta invitá i ofresé boso pa yuda realisá i huntu forma parti di e éksito di Radio BròKèS 93.5 FM.
Danki pa e privilegio ku ami Herbert huntu ku mi esposa Maria Elena, por ta forma parti di e ekipo, é famia di BròKèS 93.5 i ku awe mi por a risibí boso atenshon.
Danki i Dios bendishoná kada un di boso.
===========================================
BròKèS 93.5 ………… Skuch’é!
.png)
Comments