Diskurso di Jan Helmond Ku e tema di aña, ‘Biba ku guera.

Dama- i kabayeronan,

Awe nos a bin huntu aki pa konmemorá e víktimanan di Segundo Guera Mundial i di otro konflikto- i mishonnan di pas.

Ku e tema di aña, ‘Biba ku guera’, Komité Nashonal 4 i 5 di mei ta pidi atenshon e aña akí pa e impakto di guera riba individuo-, famianan i komunidat. E komité ta enfoká e temporada benidero prinsipalmente riba e tema di traspaso pa e siguiente generashon: kon rekuerdonan ta desaroyá nan mes di e promé pa e siguiente generashonnan? I ki tipo di nifikashon esaki tin pa opinionnan tokante libertat i falta di libertat?

E tema aki ta konektá direktamente ku e pasado di sklabitut. Na yüni i yüli ta start e aña di konmemorashon Pasado di Sklabitut i ta habri esaki en grande den henter Reino. Nos ta para ketu e ora ei na e echo ku te ku dia di awe, e doló i rekuerdonan di sklabitut tin influensia riba generashon tras di generashon i pues awendia ainda por sintié klaramente den nos komunidat. E pasado di sklabitut i e diferente gueranan ta herensianan ku a traves di tempu ta keda traspasá pa tur generashon. Te asta si e generashon mas hóben a lanta den libertat, nan ta biba ku i ta formá pa e rekuerdonan doloroso di guera i opreshon di nan antesesornan.

E siglonan di opreshon i eksplotashon tin influensia riba presente. Den patronchinan diskriminatorio di eksklushon i stereotiponan rasista, den desigualdat sosial. Nos Promé Minister a bisa den su diskurso di 19 di desèmber 2022, ku no por kulpa ningun hende ku ta biba den presente personalmente pa sklabitut, pero ku nos no por ignorá influensia di e pasado den nos tempu. Pero no laga esei ta un motibu pa no hasi nada, huntu nos mester dal pasonan padilanti i kontinuá huntu.

Sabiendo esaki, nos mester amplia nos konosementu al respekto i keda den kontakto ku otro. Un konekshon den kua tin espasio pa diferensia i komprenshon pa e pasado di otro. Kaminda diversidat no ta un opstákulo, pero al kontrario un enrikesimentu. Ta esensial pa keda den kontakto ku otro i pa pone e hende sentral, ta solamente asina nos por yega na solushonnan i logra algu huntu ku otro. Tur kos ta kuminsá ku rèspèt pa otro. E forma kon nos ta siña anda ku nos historia por ta esensial pa nos futuro. Un futuro den kua nos a siña di e pasado i por biba ku otro den harmonia i pas, sin distinshon.Kaminda no ta husga personanan a base di nan desendensia, koló, religion, orientashon òf pasobra nan tin un opinion diferente, pero kaminda ta respetá tur hende.

Nos ta reuní na e momentunan akí pa konmemorá tur persona ku a entregá nan bida den situashonnan di guera òf konflikto. Laga nos realisá nos mes ku nos mester keda traha ku otro tur dia pa logra pas i libertat pa un i tur, pasobra nos tur ta igual. Tur persona ku nos rekordá awe tin un otro historia, pero e libertat pèrdí ta loke ta konektá nos ku otro awe.

Laga nos tei pa otro i siña ku ‘biba ku guera’ tin un impakto hopi grandi i tin influensiá di generashon pa generashon pa tempu largu. Laga nos konmemorá huntu den solidaridat, kada un ku su propio rekuerdo- i pensamentunan.

===========================================

BròKèS 93.5 ………… Skuch’é!