Resientemente na okashon di e evento yamá ‘Sa Mas di Nos Radio’ den kuadro di tres aniversario di emisora BròKès 93.5 FM, konosido Theo ‘Kabuki’ Frans tambe a hiba palabra. El a hasi esaki komo un fiel skuchadó di e emisora, kual orguyosamente Kabuki ta konsiderá tambe su radio.
DISKURSO DI THEO ‘KABUKI’ FRANS
Rumannan, salú!
Na promé lugá mi mas sinsero palabranan di felisitashon na gerensia i e famia kompletu di Radio BròKèS ku nos di tres aniversario. Ya kaba? Ta manera ayera
Di otro banda: awó numa. Pasó ei mes ta mané masha hopi aña nos emisora tin. Pa motibu ku bon mirá BròKèS ta un kompleho establesí den nos realidat di bida. Ta imposibel imaginá nos komunidat i sigur e mundu di radio sin Radio BròkèS.
Fo’i e momentu ku m’a tuma nota di nasementu di Radio BròKèS, m’a sinti un orguyo komo sifuera ta di mi mes e emisora ta. Pero te ku awe i pa semper mi ta sigui sinti mané ta ‘mí radio’. … I ta mí radio mes mes.
Pasobra:
Ta radio di un mucha di mi bario ku mi konosé fo’i ten’ m’a haña tinu i a biba bon ku nan te ku awe.
Ta un radio ku su lombrishi ta derá den e mesun kurá ku mi lombrishi ta derá. Kurá di Nikiboko.
Ta un radio úniko, meskos ku mi me’.
Kontrali na otronan, ta un radio situá den un bario chikí i no den siudat òf besindario. Anto pa kolmo den mí bario.
Ta p’esei mi ta sinti mané ta mí radio. Pero mas ainda Radio BròKèS ta mi radio pasobra ku su tono positivo i ritmo dibertido e ta ofresé loke mi ta pidi di un radio. Ademas e ta duna mi tur sorto di informashon relevante pa mi ta na altura di loke mi mester sa. E ta trese notisia serio, konkreto i verídiko.
Den un palabra: e ta entretené, informá i eduká. Nèt mi ko’.
Sin ku mi sa kua tur ta, mi ta kere ku awendia nos tin basta dos, tres, radio mas riba nos isla. Tin di nan ku mi no sa ni nan nòmber, i tin ku mi no sa ni di nan eksistensia.
Pero sí mi ta di opinion ku tur tin derechi di eksistensia. Pa kon grandi òf chikí ku nan por ta. Pasobra kada un tin su oyentenan. Tur tin hende ku ta sigui nan. Loke sea mes e motibunan ku e oyente-siguidónan ta sigui nan.
Tin ku tin komo oyente hóben so. Otro ta hende grandi so. Algun ta sigui esun ku otronan ta sigui sin ku nan mes pakiko nan mes ta sigui’é. Echo ta: Sin hende/sintonia no tin radio/emisora.
Asina ta tambe ku emisoranan tin nan empresa/ kompania, entidat o instansianan ku ta hasi uso di nan servisio komo medio di komunikashon pa yega na e konsumidó i óf miembro di nos komunidat.
Meskos tambe, awendia mas i mas empresa i instansia ta hasi uso di otro medio di komunikashon ‘e famoso ret sosial’ pa yega n’e konsumidó. Anto ta aki ku mi ke rekordá tur empresa pa no kometé e fayo garafal di supestimá ningun medio. Pasobra kòrda ya nos a bisa ku kada radio/emisora/medio tin su siguidónan.
I pa negoshi no ta importá ken kumpra, basta kumpra. Pues: Kada simia ta UN simia. I Radio Bròkès hasta tin e suerte di por bisa ku e ta bon representá den e kategoria mas kumpradó.
No wòri, Radio BròkèS 93.5 ta un radio masha sosial. BròkèS no ta hasi niun klase di distinshon di persona ni gremio. Abo tambe ta bonbiní den ‘nos’ kaluroso famia. Ki’ bo di? Si! BròkèS ta mi radio… Un stail…. Bo n’ sa?
Na’,na’ na’, ….. nada mas, …….. BròkèS 93.5.
===========================================
BròKèS 93.5 ………… Skuch’é!
.png)
Comments