Inisio Programa di Investigashon Sientífiko Internashonal Pasado di sklabitut

Pasado di sklabitut kolonial di Hulanda i su impakto a forma diferente pais rònt mundu profundamente. Tòg e konosementu ku ta disponibel tokante e pasado di sklabitut kompartí akí ta skirbí partikularmente for di perspektiva kolonial.

Pa enrikesé nos perspektiva, minister Dijkgraaf (Enseñansa, Kultura i Siensia) ta inisiá un koperashon global di sientífikonan riba e tópiko akí awe na Aruba. Esei el a anunsiá awe durante un mishon di konosementu den Karibe.

Dijkgraaf ta bisa: “Mas konosementu sientífiko di nos pasado kompartí ta di gran importansia. Den esei ta esensial ku tin espasio pa hasi investigashon for di perspektivanan nobo, na e lugánan kaminda sklabitut tabata eksistí.

E konosementu ku esei produsí ta di gran balor pa komprondé nos historia kompartí mas mihó. Mi ta konsider’é hopi balioso pa por inisiá e programa di investigashon akí durante e Aña di Konmemorashon Pasado di Sklabitut.”

Inisio den e área karibense; Dijkgraaf kier promové e kolaborashon di konosementu riba pasado di sklabitut entre universidatnan rònt mundu, kuminsando den nos propio Reino. Pa investigashon na Aruba, Kòrsou i Sint Maarten e ta destiná 375.000 euro te ku 2027. Ku esei sientífikonan lokal por hasi investigashon riba pasado di sklabitut den e paisnan akí. Lo tin posibilidat tambe pa hasi investigashon riba e tópiko akí na Hulanda Karibense (Boneiru, Saba i Sint Eustatius). Tin un presupuesto apart pa esaki.