Riba djaweps 16 di febrüari, alrededor di 11 or di mainta sentral di polis a risibí notifikashon ku a enkontrá posibel restunan di un kráneo humano riba Kaminda pa bai Washington Park. E patruya ku a bai na e sitio a sera e área i e spesialistanan di departamentu Forénsiko i reshèrshi a bini pa investigá e kráneo. Despues a sigurá e restunan enkontrá i a tuma kontakto ku e Instituto Forénsiko Hulandes (NFI) pa un investigashon mas profundo.
E promé indikashon ta ku ta trata en bèrdat di un kráneo humano, pero investigashon mas aleu mester konfirmá esaki. Den e área a enkontrá tambe un posibel wesu humano, ku a keda sigurá pa mas investigashon. Kuerpo Polisial Hulanda Karibense ku sosten di STINAPA a inisiá un búskeda mas aleu den e área pero no a bin topa ku otro restu.
Medionan di komunikashon i famia di e hòmber pèrdí, Ludwig Cicilia, a hasi sierto konekshon den e kaso aki debí na e sitio ku a enkontrá e posibel restunan humano. KPCN no ta deskartá e posibilidat ku lo por trata di restunan di e persona pèrdí, pero na e momentunan aki no tin prueba pa konfirmá esaki. E investigashon den kolaborashon ku e Instituto Forénsiko Hulandes (NFI) lo komprobá esaki. Asina ku tin mas informashon tokante e identidat di e restunan enkontrá, KPCN lo tuma kontakto ku e famia òf personanan involukrá. Esaki a keda komuniká tambe ku famia di señor Cicilia.
===========================================
BròKèS 93.5 ………… Skuch’é!
.png)
Comments