Invitashon Apertura di Parke Isidel, Djadumingu 19 di Mei 2024

Parke Isidel Boneiru, e parke di rekreashon tan sperá na rotònde di Hato, ta habri su portanan pa públiko riba djadumingu 19 di mei 2024. E apertura festivo ta bai akompañá ku presentashon di vários artista lokal di renombre, entre otro Luis Moka, Foyan Boyz, FMK i mas! E evento ta grátis i e promé 400 bishitantenan ta haña un bríndis di bon biní pa konhuntamente dal un salú riba e momentu festivo akí.

Pa ta sigur ku tur hende por presensiá e apertura, for di 4or atardi te 11or anochi lo tin transporte disponibel for di Kompleho Deportivo Jorge Nicolaas pa Isidel Beach Park.

E proyekto ambisioso akí ku Bonaire Overheidsgebouwen NV (BOG) a desaroyá, ta primintí di bira un añadishon hopi bon biní na e fasilidatnan rekreativo na nos isla.

Parke Isidel ta brinda un variedat di fasilidat, entre otro un bahada pa hende ku limitashon físiko pa nan haña akseso fásil na laman, palapa, kiosko, un restorant (ku ta habri su portanan na luna di yüli) i Wifi grátis.

Den futuro serkano ta bin un ‘slipway’ tambe, un lugá pa baha boto chikitu.

Vários posibilidat pa rekreashon banda di fasilidatnan tradishonal e parke ta ofresé tambe posibilidatnan moderno, sostenibel i aksesibel pa rekreashon.

Bishitantenan por disfrutá di sitionan pa barbekiú, ehersisio pa tantu hóben komo hende grandi den áreanan pa hasi ehersisio i hunga i otro formanan di rekreashon, manera aksesibilidat ilimitá na e bich di Playa Lechi.

Parke Isidel Boneiru ta primintí di bira un lugá vibrante di enkuentro pa tantu habitantenan lokal komo bishitantenan, kaminda tur hende por gosa di e bunita ambiente i e diferente posibilidatnan di rekreashon ku e parke tin di ofresé.

BOG ta pidi nos komunidat pa tesorá e parke i konservá esaki pa futuro generashonnan.

‘Parke Isidel Boneiru ta un parke úniko di i pa nos tur. Ta konfia ku tur hende lo kuida e parke i respetá otro bishitantenan.’ Pa mas informashon tokante e apertura, futuro eventonan i pa hasi reservashon pa un di e fasilidatnan di e parke, bishitá e wèpsait

www.isidelbeachpark.com i/òf download e ‘mobile app’ Isidel Beach Park.