Kantidat Rekòrt di 16.505 Bishitante den Aprel 2024, Dia di Rincon a Hunga un Ròl Importante

Boneiru a yama bonbiní na un kantidat rekòrt di 16.505 bishitante stayover den aprel 2024. Dia di Rincon a hunga un ròl importante pa por a logra e resultado akí

E sifranan preliminar di TCB pa luna di aprel 2024 ta mustra yegada di un kantidat rekòrt di bishitante na nos isla. Pa komparashon: na aña 2023 e kantidat total di bishitante tabata 15.519, miéntras ku na aña 2019 esaki tabata 14.100, loke ta nifiká un tendensia positivo den Boneiru su turismo. Esaki ta representá un oumento di aproksimadamente 6,6% entre aña 2023 i aña 2024 i un kresementu di aproksimadamente 17,1% entre aña 2019 i aña 2024.

Bishitantenan hulandes a keda e grupo mas grandi ku 44% di e total, siguí pa e

merikanonan ku 20%. Banda di esaki biaheronan for di Kòrsou a representá 19% di

nos bishitantenan. Canada, Alemania i Aruba tambe a kontribuí konsiderabelmente

na Boneiru su sektor turístiko.

E kantidat di bishitante kanades a oumentá for di 275 na aña 2023 pa 611 na aña

2024, un oumento impreshonante di aproksimadamente 122%, danki tambe na e

buelo di WestJet for di Toronto.

Na luna di aprel WestJet a terminá su buelonan di e temporada tras di lomba i lo kontinuá ku esakinan durante e próksimo temporada di wenter.

Dia di Rincon a hunga un ròl importante na momentu di atraé mas bishitante for di e

anterior Antia Hulandes, di manera ku esaki a enrikesé e ofertá variá di turista na

nos isla mas tantu ainda. Banda di esaki tabatin en total 3335 bishitante for di Kòrsou, mas òf ménos 1000 bishitante mas kompará ku un luna normal.

E bishitantenan for di Aruba tambe a bini dilanti komo un merkado prominente pa

Boneiru, ku 595 bishitante stayover na luna di aprel, i ku esaki Aruba a posishoná su

mes komo e di sinku merkado ku mihó prestashon.

E bishitantenan for di Merka a bini prinsipalmente for di New York, Florida, Massachusetts, California, Colorado i otro estadonan grandi.

E gruponan di edat ku representashon mas grandi tabata esun di 55 pa 64 aña (25,9%) i esun di 45 pa 54 aña (20%), loke ta un indikashon di un interes fuerte serka biaheronan di edat medio. E bishitantenan for di Hulanda a bini prinsipalmente for di Noord-Holland,

Zuid-Holland i Noord-Brabant, kaminda e grupo di edat di 45 pa 54 aña (19,7%) i esun di 55 pa 64 aña (19,2%) a dominá.