Pronto fase 2 ta na turno
Mehorashon i mantenshon di Kaya Aruaco, un otro proyekto di den kuadro di mantenshon i drechamentu di kaya, a ser realisá dentro di un periodo di tempu rápido. Riba 11 di sèptèmber 2023, e kontratista enkargá ku e tarea aki, a kuminsá ku e trabounan di ponementu di un kapa di asfalt i konsekuentemente a terminá ku e trabounan aki e siguiente dia. Asina diputado Hennyson Thielman ta partisipá. E trabounan a kana debidamente konforme planifikashon i satisfakshon. Ta trata akí di e promé fase di e proyekto pa drecha i mantené e kaya akí ku ta konektá bario di Hato ku Nort’i Saliña.
Alivio
Na komienso di luna di yüni último, diputado enkargá ku Planifikashon i Desaroyo, sr. Hennyson Thielman, huntu ku su kolega diputado Pablo ‘James’ Kroon, a anunsiá inisio di e promé fase, kual ta konsistí di trabounan pa drecha e kaminda aki, ku ta kondusí entre otro pa e establesimentu di Curoil. Entidat Públiko di Boneiru, den persona di e mandatario a enfatisá e importansia di e kaya akí, kual no ta pa solamente e pueblo (konsumidó) i empresanan ku ta hasi uso di e karetera akí pa yega na e establesimentu di Curoil, pero tambe pa empleadonan di e kompania di kombustibel, ku tur dia ta hasi uso di e kaya aki, ku tabata den un estado deplorabel, pa yega nan boka di trabou. Partikularmente den temporada di áwaseru e kaminda aki ta bira intransitabel.
Ku orguyo diputado Thielman ta anunsiá e finalisashon di e promé fase, ku sigur lo trese un alivio.
Fase 2
Ta papia di e promé fase, ya ku e intenshon ta pa den e segundo fase sigui drecha e loke ku a keda di Kaya Aruaco pa asina por garantisá e konekshon ku Nort’i Saliña den su totalidat. Pronto lo duna mas informashon tokante di e trabounan relashoná ku e fase akí, diputado Thielman ta duna di konosé.
BròKèS 93.5 ………… Skuch’é!
.png)
Comments