Kòntròl Fruktífero di Duana, Konfiskando Entre Otro 1004 Kilo di Karkó

Kòntròl di Duana fruktífero; Den e lunanan tras di lomba Duana a ehekutá diferente kòntròl kaminda a topa i konfiská bestia òf mata ku ta riba e lista  di e Kombenio Internashonal di Komersio di Espesienan Protehá (Convention on International Trade of Endangered Species.

Karpachi di  krokodel Melanosuchus Niger; Djárason 3 di aprel a tene un kòntròl riba paketenan ku a yega via FXDC. Durante kòntròl a topa ku un kabes di karpachi di un krokodel. Despues di evaluashon di un eksperto a konstatá ku ta trata di karpachi di un krokodel Melanosuchus Niger ku ta permanesé riba e lista di CITES. E risibidó di e pakete no tabatin e sertifikashon di CITES. A konfiská e kabes pa investigashon mas aleu.

Konfiskashon di karkó; Durante un akshon konhunto ku partnernan di kadena dia 23 di yüni, a tene un kòntròl riba un vehíkulo na Kaminda di Lac. Durante e kòntròl a konstatá ku e baki di e vehíkulo tabata yená ku karkó. E shofùr a deklará ku huntu ku un otro hòmber nan a kaba yega for di islanan Aves ku e karkónan. E otro hòmber no tabata presente na e momentunan ei. E hòmber presente no tabatin papelnan di duana ni sertifikadonan di CITES nesesario huntu kuné. A konfiská e karkónan (en total 1004 kilo) i destruí esakinan mesun dia.

Den e akuerdo di CITES tin regla pa protehá mas o ménos 5.800 tipo di bestia i 30.000 tipo di mata. E ta un akuerdo internashonal na kua Union Oropeo i 184 pais mas ta partisipá. Kua bestia i mata ta protehá i bou di kua kondishon por hasi negoshi ku nan, ta stipulá den CITES. Bou di CITES ta kai bestia òf mata bibu òf morto òf produktonan derivá for di esaki. Pues e reglanan ta konta tambe pa por ehèmpel e kokolishi di karkó, pero tambe pa e koral morto. Remedi i suplemento pa nutrishon por kontené produkto ku ta kai bou di e regulashon di CITES.

Si bo ta planiá pa bende òf kumpra un bestia òf mata, chèk e lei i regulashon i no hasi kompra òf benta si e bendedó no por mustra e dokumentunan rekerí. Asina bo no ta haña bo embolbí den negoshi ilegal di bestia òf mata sin ku bo ke.

Mas informashon tokante negoshi di bestia i mata protehá i tambe pa petishon di dokumentunan di CITES por akudí na a wèpsait di ‘Rijksdienst voor Ondernemend Nederland, www.rvo.nl/onderwerpen/cites.