Oumento di e kapasidat di rekuperashon di naturalesa

Oumento di e kapasidat di rekuperashon di naturalesa pa medio di solushon basá riba naturalesa na e islanan di Karibe Hulandes

Den un tempu kaminda mundu ta eksperensiá e konsekuensianan di kambio di klima, naturalesa por sirbi komo un manera práktiko pa nos adaptá nos mes. E islanan di Karibe Hulandes, ku ménos ku 340.000 habitante i un superfisie di solamente 800 kilometer kuadrá, tin hopi patrimonio natural. E islanan Aruba, Boneiru, Kòrsou, Sint Maarten, Sint Eustatius i Saba ta sobresalí komo e hòtspòtnan mas importante pa biodiversidat den Reino Hulandes.

Resientemente dia 10 di novèmber Dutch Caribbean Nature Alliance (DCNA) a trese manehadónan di medio ambiente huntu pa un simposio tokante ‘Nature-Based Solutions’ (NBS) pa rekuperashon di ekosistema. E evento, organisá pa DCNA den kolaborashon ku Fundacion Parke Nacional Aruba' (FPNA), ámbos organisashonnan ‘non-profit’ ku ta dediká nan mes na konservashon di naturalesa, tabatin e honor di por yama bon biní na Su Altesa Real Prinsesa Beatrix, Gobernador di Aruba, Minister Presidènt, Minister di Naturalesa i delegashonnan di tantu DCNA komo FPNA, huntu ku partnernan i otro interesadonan ku tambe tabata presente.

Nature-Based Solutions komo aserkamentu pa redukshon di riesgo pa medio ambiente

Den e diskushon ku ta tumando lugá rònt mundu tokante kambio di klima, interes ta oumentando pa solushonnan basá riba naturalesa (NBS) komo strategia pa kombatí vários riesgo pa medio ambiente, manera inundashon i desplasamentu di tera. NBS ta un aserkamentu inovativo ku ta enfoká riba maneho sostenibel di ekosistema, tantu natural komo adaptá. E aserkamentu akí, ku Komishon Oropeo ta rekonosé komo akshonnan ‘inspirá i sostené pa òf kopiá for di naturalesa’, ta brinda solushon pa hopi desafio sosial i ta habri kaminda pa bentaha, tantu pa komunidat komo pa medio ambiente. E solushonnan akí no solamente ta sòru pa stabilidat ekológiko, pero nan ta ofresé bentahanan sosial mas amplio, entre otro kresementu ekonómiko i mehorashon di salú públiko. Miéntras ku kada biaha mas organisashon ta rekonosé importansia di tresementu den ekilibrio di salú di ekosistema ku medida di klima i desaroyo sostenibel, NBS a haña un ròl prominente den diskushonnan internashonal i importante tokante maneho, entre otro e ‘UN’s Sustainable Development Agenda 2030’ (e agènda 2030 pa desaroyo sostenibel di Nashonnan Uní).

E simposio a sirbi komo plataforma pa ekspertonan pa introdusí e konsepto di NBS i deliberá tokante esaki. A dediká atenshon mas profundo na tópikonan manera e bèkgrount teóriko di NBS, e retonan i oportunidatnan pa konservashon di naturalesa na e islanan, mekanismonan di finansiamentu pa NBS, i institushon di kuadronan di kolaborashon pa ‘partnership’-nan di NBS. A klousurá e simposio ku un ròndu di diskushon tokante nesesidat di aplikashon di NBS i e konosementu ku a atkerí for di ehèmpelnan resien di práktika.

Direktor di Dutch Caribbean Nature Alliance, Arno Verhoeven, a enfatisá ku e ambiente di biba na e islanan den un grado krusial ta dependé di e ekosistemanan úniko di e islanan. ‘Dunamentu di preferensia na Nature-Based Solutions ta esensial na momentu di enfrentá e kantidat grandi di desafio ku ta menasá nos ekosistema. Nos ta konbensí ku tresementu huntu di stakeholdernan, fortifikashon di e ret di Karibe Hulandes, i di e manera ei hasi interkambio di konosementu, ekspertisio i medionan posibel, lo yuda nos pone pasonan padilanti na momentu di implementashon di NBS pa protekshon di nos presioso ekosistemanan. E simposio akí ta forma un paso den e direkshon ei,’ asina Verhoeven a sigurá.

Durante presentashon di FPNA, e Chief Conservation Officer, señora Natasha Silva, a splika mas tokante e espesienan ku a ekstinguí na Aruba i e nesesidat di esfuerso di konservashon. El a pone énfasis riba importansia di konservashon di e biodiversidat úniko di Aruba i a mustra riba e solushonnan basá riba naturalesa komo strategianan úniko pa konservashon, entre otro rekuperashon di habitatnan natural pa sostené bestia di mondi, implementashon di práktikanan sostenibel pa uso di suela pa prevení pèrdida di habitat, i establesimentu di áreanan protehá pa preservá ekosistemanan krítiko. Silva a suprayá tambe e ròl importante di enbolbimentu komunitario den inisiativanan di konservashon. Enfatisando esaki, Silva a deklará: ‘Enfoká riba prioridat ku e efekto mas grandi. Mas tantu hende bira konsiente, mas tantu nos ta duna nos mes espasio pa hiba e diálogo tokante konservashon akí.’

Miéntras e islanan di Karibe Hulandes tin di haber ku desafionan ekológiko úniko – tresementu den ekilibrio di biodiversidat riku ku menasa di aktividat humano i kambio di klima – no por enfatisá importansia di e Nature-Based Solutions akí sufisientemente. E konklushon mas importante ta e nesesidat pa adaptashon lokal i ehekushon di e solushonnan akí, loke ta eksigí esfuerso konhunto, kordinashon i interkambio di konosementu entre tur e partidonan enbolbí, pa salbaguardiá un futuro sostenibel pa e islanan di Karibe Hulandes.

DCNA ta ekspresá su gratitut na e spònsernan: Milton Harms Fonds den kolaborashon ku Prins Bernhard Cultuurfonds Caribisch Gebied, Aruba Tourism Authority, VNO, Ministerio di Asuntunan Interno i Relashonnan den Reino, Grant Thornton, Nationale Postcode Loterij i Pelican Adventure pa nan kontribushon na e simposio i pa nan stimulashon di un ambiente di kolaborashon i progreso, loke ta enfatisá e forsa di ‘partnership’ den realisashon di kambio ekológiko positivo.

TOKANTE Dutch Caribbean Nature Alliance

Dutch Caribbean Nature Alliance (DCNA) a keda fundá na aña 2005 i ta representá un aserkamentu típiko karibense di konservashon di naturalesa. Den un region sumamente fragmentá, DCNA ta rekonosé ku e desafionan riba tereno di konservashon di naturalesa, simplemente ta muchu grandi pa un organisashon òf un isla so enfrentá. Na Aruba, Boneiru, Kòrsou, Saba, Sint Eustatius i Sint Maarten a rekonosé e bèrdat akí i komo reakshon riba esaki a funda DCNA, un organisashon ku un solo bos ku ta reflehá un esfuerso konhunto pa protekshon di naturalesa den henter e region. DCNA ta di opinion ku huntu nos ta mas kapas pa haña solushon pa konfrontá e menasanan komun akí. A edifiká DCNA for di abou bin ariba i e ta un berdadero organisashon ‘grassroot’, ku a sa di hinka un ret aktivo di konservashon di naturalesa di organisashonnan outónomo den henter e área di Karibe Hulandes.

BròKèS 93.5 ………… Skuch’é!