Manera ta konosí siman pasá djabièrnè, Ernest De Lanoy a pidi su retiro komo presidente di Piskabon. Despues di esei a sigui vários publikashon, reakshon i komentario via medionan di komunikashon i prinsipalmente riba retnan sosial.
Manera indiká den nan promé reakshon pa medio di un komunikado, direktiva di Piskabon a informá ku e retiro a surgi despues di un reunion ku sr, De Lanoy tabatin ku diputado Cicilia. E mesun komunikado a menshoná ku e direktiva kompletu i miembronan no ta aseptá sin mas e petishon di retiro di De Lanoy i tambe ta eksigí un aklarashon di parti gobièrnu di Boneiru.
Mester menshoná ku ni di parti gobièrnu di Boneiru tampoko di diputado Cicilia no a sali ningun reakshon ‘ofisial’ tokante henter e desaroyo aki.
Di parti Piskabon awe djaluna 27 di mei, e direktiva den otro un komunikado ta trese lo siguiente dilanti;
---
Piskabon ta tuma distansiá di tur spekulashon i informashon publiká riba retnan sosial.
Piskabon tin obligashon ku su miembronan na promé lugá. Esei Piskabon a kumpli kuné di imediato ku un reunion general djaweps 23 di mei último. Esaki a resultá ku direktiva di Piskabon i miembronan ta para firme tras di nan presidente i sostené unánimanente. I a bisa ku nan no ta aseptá retiro di sr. De Lanoy.
Piskabon ta opta pa warda te ora ku Gobièrnu di Boneiru duna e miembronan un splikashon di loke a bai robes. Piskabon ta di opinion ku tira lodo riba retnan sosial i via prensa, no ta yuda ningun hende.
Piskabon ta keda pensa den solushon i no problema. Si Piskabon a hasi algu robes, siña nos kon sí nos por hasi’é mihó. I ta ei nos ta!
Piskabon ta pidi pueblo di Boneiru i sigur prensa pa tene un tiki pasenshi. No tin sentido pa spekulá òf fantasiá motibunan inhustu òf ku por hasi daño na otro. Nos lo bini sigur ku un rueda di prensa na su debido tempu.
Piskabon ta gradisi pueblo di Boneiru i prensa pa e komprenshon i pasenshi.
.png)
Comments