Nov 10, 20222 min read

PROMÉ INVESTIGASHON TOKANTE SANGURA NA E ISLANAN ABC DEN KASI 75 AÑA

Na 2018, Naturalis Biodiversity Center a ehekutá e promé investigashon tokante sangura na e Islariba Hulandes (Sint Maarten, Statia i Saba) den kasi 70 aña. Pa luna di novèmber nan tin planeá pa ripití e investigashon, e biaha akí riba e islanan di Aruba, Boneiru i Kòrsou. E tim lo konsistí di sinku investigadó i dos studiante desendiente di diferente instituto i universidat, i nan lo ehekutá e investigashon den kolaborashon estrecho ku e departamentonan di kontrol di vèktòr (animal ku ta plama malesa) na kada isla.

Banda di e echo ku nan ta un molèster na kas, sangura por plama un kantidat di mikro organismo kousante di malesa pa hende i animal ku ta responsabel pa diferente malesa manera dengue, chikungunya, malaria, Zika, keintura di Rift Valley i di West Nile. Durante e último dékada, e region di Karibe a pasa den un seri di brote di malesa kousá pa infekshon di sangura, inkluso e brote di chikungunya na 2014, e brote di Zika na 2016 i diferente brote di dengue ku esun mas resien ta dokumentá na 2020.

Investigashon di Sangura

Un estudio nobo, bou di guia di Naturalis Biodiversity Center di Leiden, Hulanda, lo evaluá e aktual biodiversidat di sangura rònt e islanan di Aruba, Boneiru i Kòrsou. E meta lo ta pa bishitá kada isla pa un periodo di 7-10 dia, harma 10-16 trampa pa kohe sangura i traha inventario di sangura adulto. Banda di esaki, lo traha muestra di larva akuátiko for di vários potensial kriadero di sangura. E investigashonnan lo tuma lugá entre 13 di novèmber pa 6 di desèmber, kuminsando na Aruba. E meta di e ekspedishon ta pa haña konosementu di e diversidat di sangura i krea hèrmènt di identifikashon pa yuda investigashon di salubridat públiko riba e islanan.

Implikashon pa Salubridat Humano

Hopi biaha durante un brote, e úniko manera pa baha e plamamentu di e malesa ta kontrol di e populashon di e sangura spesífiko ku ta responsabel pa sembramentu di e malesa. Pa e motibu akí, maneho efektivo ta eksigí informashon al dia tantu tokante e populashon lokal di sangura komo tambe nan distribushon riba e islanan. Komo ku kondishonnan kousá pa kambio di klima ta sigui na trese kambio den kondishonnan di medioambiente, mará na kresementu di populashon humano riba e islanan, nos por spera di mira kambio den otro populashon ekológiko (manera di sangura) den futuro.

E ekspedishon akí ta parti di e Mobocon Programa, ku ta enfoká riba kreashon di kapasidat den kontrol di malesa kousá pa sangura na Boneiru, Statia i Saba. E programa akí a start kaba na 2017 ku fondo di e Ministerio di Salubridat, Bienestar i Deporte.