Akibou bo ta haña e medidanan di mas importante pa siudadano- i empresanan na Hulanda Karibense, ku ta parti di e Proposishon di lei Plan Fiskal 2024. A manda e proposishon aki riba Prinsjesdag pa e parlamentonan. Ora ku Tweede Kamer i Eerste Kamer bai di akuerdo ku e proposishon, e medidanan ta drenta na vigor entrante promé di yanüari 2024.
Introdukshon
Na 2010 Boneiru, Sint Eustatius i Saba a bira parti di Hulanda komo munisipionan partikular. For di e momentu ei, un parti di e sistema fiskal riba e islanan den liña grandi a keda igual. Gabinete kier aktualisá i mehorá e sistema e añanan benidero. Ku e proposishon di lei aki ta tuma e promé paso pa logra esei. E medidanan den e proposishon di lei aki ta relevante pa partikularmente empresario i tin ménos impakto pa siudadano.
Meta
Aktualisá e sistema aktual, di manera ku e ehekushon den práktika ta mehorá i kaminda esei ta posibel, ta bira mas simpel. Ademas, gabinete tin e intenshon pa, mediante algun areglo, oumentá e kapasidat finansiero di esnan ku entrada abou.
Proposishon
Ta trata di un proposishon di lei ku diferente medida rondó di diferente tema. Esnan di mas importante ta relashoná ku un impuesto mínimo pa empresario, e rekargo di integrashon, e opbrengstbelasting, e areglonan di suèldu usual (gebruikelijke loonregeling) i e Areglo pa Empresa Chikitu (Kleine Ondernemersregeling (KOR)).
Mas aleu ta bin un obligashon pa deklará ora kumpra un bibienda relashoná ku vastgoedbelasting.
Kiko e medidanan aki ta nifiká pa abo?
Akibou bo ta haña e kambionan di mas importante pa siudadano i empresa. Pa un spesifikashon kompleto nos ta referí na e dokumentonan di Prinsjesdag: Miljoenennota en Rijksbegroting | Rijksoverheid.nl
Outonan di pasahero:
Pikòp (ku un kabina) i vehíkulo di entrega no ta kai mas bou di e tarifa regular di ABB, pero bou di e tarifa haltu. E tarifa regular di ABB na Boneiru ta 8% i e tarifa haltu 25%. Na e islanan ariba, e tarifa regular di ABB ta 6% i e tarifa haltu (progresivo) ta dependé di balor di e outo. E tarifa progresivo ta konta ku e porsentahenan di: 10, 18, 22 i 30.
Esei no ta konta pa vehíkulonan di entrega ku un funshon spesial manera waha di morto, ambulans, polis i brantwer.
Obligashon pa deklará Vastgoedbelasting: Si abo komo propietario nobo di un kas ku no ta bo residensia prinsipal òf di un komersial lokal no risibí un aanslag di impuesto pa Vastgoedbelasting, outomátikamente bo ta obligá pa deklará esaki abo mes. Si no, bo ta kore riesgo di haña un but.
Abolishon di eksonerashon di dividendo: Ta eliminá e eksonerashon di dividendo den impuesto di entrada (inkomstenbelasting), den kua tabata eksonerá dividendo te na e suma máksimo di 5.000 dòler pa aña. Ora di stipulá e entrada taksabel den un aña, entrante 2024, mester paga impuesto di entrada (inkomstenbelasting) riba tur dividendo ku a risibí ku ta surpasá e suma liber di impuesto (i e kompensashon di grandinan).
Opbrengstbelasting:
E kondishonnan pa risibí un dekreto di establesimentu (vestigingsplaatsbeschikking) pa opbrengstbelasting ta bira mas fásil di un banda i di e otro banda, mas estrikto pa evitá mal uso. Ta trata aki di kompanianan di un holding ku ta tene un porsentahe kualifiká den un kompania supsidiario na Hulanda Karibense, ku ta disponé di un dekreto di establesimentu.
Areglo di suèldu usual (Gebruikelijk loonregeling):
E areglo di suèldu usual ta konta pa un tenedó di interes signifikativo (aanmerkelijkbelanghouder) ku ta traha pa e kompania. E areglo di suèldu usual ta enserá ku ta konsiderá ku un tenedó di interes signifikativo ta risibí un suèldu ku ta normal pa e nivel i durashon di su labor. Ta adaptá i amplia e areglo aki riba algun parti:
Na lugá di e suèldu for di un relashon laboral similar, ta apliká komo norma di komparashon e suèldu for di e relashon laboral mas komparabel.
E areglo di suèldu usual ta aplikabel tambe pa e partner di e empleado ku un interes signifikativo den un kompania.
Pa e asina yamá ‘éénpitternan’ ta basa e kriterio di komparashon riba e volúmen di benta di e kompania.
Ademas, ta supstituí e suma standart pa un suma ku ta fiha riba dos bia e suma liber di impuesto.
Rekargo di integrashon:
E rekargo aki tin di aber ku e ekivalente di ‘btw’ i ku na Hulanda a abolí kaba na 2014. Awor ta abolí e rekargo aki na Hulanda Karibense tambe, pa motibu ku e ta sòru tambe pa puntonan problemátiko riba merkado di bibienda. Ku su abolishon ta eliminá esaki tambe. Por ehèmpel ta bira mas fásil pa empresarionan hür kas ku nan mes a konstruí.
Areglo pa Empresa Chikitu (Kleine Ondernemersregeling (KOR):
Ta oumentá e márgen di volúmen di benta anual di 20.000 dòler na 30.000 dòler, di manera ku empresario chikitu no tin mester di paga ABB.
Impuesto mínimo:
E sistema aktual na Hulanda Karibense no konosé impuesto riba ganashi (winstbelasting) pa kompania. Den situashon ekstraordinario esaki no ta deseabel, komo ku e ta fomentá mal uso i froude den situashon internashonal. Ku e medida aki, ta implementá un impuesto mínimo i ta kumpli ku e modelo hulandes i
norma oropeo ku ta konta pa impuesto mínimo pa empresario internashonal operativo. Ademas, e medida aki ta simplifiká e sistema fiskal i ta hasié mas prepará pa futuro. Ta trata aki solamente di e gruponan multinashonal ku un volúmen di benta mundial di 750 mion euro òf mas i ku un sukursal na Hulanda Karibense.
BròKèS 93.5 ………… Skuch’é!
.png)
Comments