RADIO BROKES 93.5 A KUMPLI TRES AÑA DI EKSISTENSIA

ENFRENTANDO HOPI RETO SUPERANDO UN TEMPU NO ASINA FÁSIL

Resientemente e emisora BròKès 93.5 FM a kumpli tres aña di eksitensia, pa e okashon aki tabatin un evento yamá ‘Sa Mas di Nos Radio’. Tabata un enkuentro pa en partikular kliente, relashonado i kolaboradónan di e emisora lantá i manehá pa Djóni Leoneta i su esposa Ethel.

Na inisio di e enkuentro aki Djóni Leoneta a hiba palabra, kuminsando na pidi aplouso pa Papa Dios, komokiera no tin niun klase di duda ku E tabata sentral pa BròKès 93.5 por a logra krusa e trayekto kumpli tres aña i tambe pa alkansá mas.

Mester tene kuenta ku BròKès 93.5 a bai den aire ofisialmente dia 8 di òktober 2019, esaki ta nifiká ku apenas e emisora tabatin kuater luna ta transmití ku ‘Shon Kovichi’ o sea COVID 19 a dal aden.

Unu kisas mas ku otro pero mayoria empresa riba nos isla ‘i rònt mundu’ a sinti e efekto di pandemia.

No solamente BròKès 93.5 pero pa mayoria empresa nobo, e efekto tabata tòg distinto i sigur mas pisá. Momentu ku a bini sierto yudansa entre otro finansiero pa empresanan riba nos isla, por bisa ku den tur kaso empresanan nobo tabata kai chikí, esaki entre otro debí ku tabata pidi sifranan di un òf asta dos aña anterior, lokual lógikamente esnan ku ménos ku un aña di eksistensia no tabatin.

Despues di sigui pusha i mustra instansianan konserní riba e eksigensianan tòg no hustu, aki aya a hasi a hasi eksepshon di manera ku tòg empresanan nobo maske ta parsialmente por a bini na remarke pa sierto yudandsa.

Apesar di tur reto, BròKès 93.5 a sa di keda firme padilanti, kreativamentente i ku konsistensia sin desviá for di nos vishon, konsepto i mishon. Tur esaki mas ku klaro danki tambe na tur kliente ku tei for di prinsipio i esnan ku durante e trayekto tambe a mustra konfiansa den nos emisora.

Igual esaki ta konta pa tur presentadó di programa, kolaboradó, demas relashonado i sin duda tambe tur skuchadó. Nos no ta menshoná nòmber pa evitá di lubidá un òf mas, pero di kurason gradisimentu na un tur. Danki pa kere den e konsepto di nos programashon.

Konsepto di nos programashon ta unu distinto, dirigí riba oyente distinto, ku ta deseá algu distinto. Igual tambe pa empresa, instansia, organisashon etc tin un eskoho mas i sigur unu distinto pa lokual ta aviso etc.

Riba e trayekto igual ku kualke empresa òf organisashon ‘sigur den prinsipio di eksistensia’ BròKès 93.5 a konfrontá aki aya detaye ‘ménos agradabel’ sea tékniko, logístiko, organisatorio i asta personal. Pero tur nos a sa di atendé ku kabes friu i simplemente mira kada unu komo eksperensia pa sigui pa dilanti. No mester lubidá ku e ekipo di nos emisora ta unu no asina grandi, asina por bisa ku pa lokual ta maneho henter e parti produkshon, e parti tékniko i atmistrativo, ta ‘nos mes ku nos’ ta atendé. E echo ku nos ta hasi menshon di esei no ta pa gaba nos mes ni tampoko ‘pa keha òf bisa ku e trabou ta pisá’ etc.’, pasobra esei ta algu ku a base di nos vishon, abilidat i eksperensia nos mes a skohe p’e. Nos ta trese esaki dilanti pasobra simplemente e ta tambe un realidat mará na e trayekto di tres aña di BròKès 93.5.

E siguiente aki; Nos mes, ta puntra nos mes; Si nos no bis’é, ken sí lo mester bis’é????

Awèl mihó kontesta ta; No tin mihó ku nos mes, pa bis’é ! Ta lo siguiente; Anke nunka i sigur nos mes no a duda, awor kumpliendo di tres aniversario i superando un tempu no asina fásil, ku konvikshon nos ta bisa ku BròKès 93.5 FM tin tur derecho di eksistensia.

Huntu ku esaki meresé no solamente di ser rekonosé komo parti di komersio boneriano i en partikular medio di komunikashon, sino tambe meresé konfiansa i sosten, i den tur sentido tratá i respetá.

Esaki tantu pa lokual ta trata e parti empresarial komersial ‘nos koleganan’ i sigur di tambe di parti entidat, instansia, gubermental i semi gubermental i òf organisashonnan públiko.

Den e kaso aki; ‘No ser rekonosé, tratá o respetá’ ta nifiká ‘no trata i no respetá’ un parti di e komunidat aki ku ta skohe pa sea regularmente òf na sierto okashon pa skucha BròKès 93.5 i ku tambe mas ku klaro meresé òf asta na sierto okashon tin ‘derecho’ di risibí informashon di kualke entidat, instansia, i òf organisashon públiko. Den mundu empresarial/ komersial semper ta i lo keda liber ‘ken sí kua nò’ den kaso di ekskogensia/ preferensia, pero eskogensia i preferensia lo keda semper ku ta dependé kua sektor i òf kua entidat, instansia òf organisashon públiko i sigur kua komunidat (isla, pais etc.).

Asta tin bes lo mester pone un banda tur tipo ekskogensia, preferensia i skohe pa interes general di kualke indole pa un komunidat.

E lokual nos a trese aki no ta bálido solamente pa nos emisora komo tal, sino pa tur empresa en partikular tur medio di komunikashon riba nos isla, ku di un manera formal/ serio i konsistente ta funshonando, tur meresé di No ser hasí ménos.

Despues di kumpli tres aña di eksistensia, BròKès 93.5 ta kla pa sigui ofresé muchu mas ainda den su programashon. Ainda falta vários ingrediente ku desde prinsipio ta parti di nos vishon, pero ku na debido tempu ta subiendo nos programashon.

Ya e último simannan ta notable sierto desaroyo, adaptashon, kambio, ampliashon pa lokual ta trata nos programashon i ainda falta mas. Nos ta sigui traha pa perfekshon i ekselensia.

Ta asina tambe ku anke ainda ku algun detaye chikitu pa perfekshoná, porfin e wèpsait di BròKèS 93.5 ta òn, pa kual nos ta invitá un i tur pa bishit’é via e link https://www.radio935bonaire.com/

Awor tambe nos página di Facebook ‘BròKès 93.5 Boneiru’ pokopoko pero sigur ta muchu mas aktivo i aktualisá.

BròKèS 93.5, E radio di bario, pa tur bario!

For di Nikiboko, pa Boneiru i pa mundu kompletu.

Pa informá, eduduká i konsientisiá, entretené i alegrá.

Tono Positivo, Ritmo Dibertido, Distinto Den Tur Sentido.

Bròkès 93.5, Danki Pa Sigui …… Skuché