Relashoná ku e komunikado den kua S. Theodora a duna di konosé ku el a denunsiá nos hefe di kuerpo debí ku no a dun’é bèk su pertenensianan konfiská, gustosamente nos ke aklará algun punto. Segun lei, Ministerio Públiko (OM) ta disidí si òf ki ora ta duna pertenensianan konfiská bèk na e doño.
Pues ta korekto ku polis no por duna e propiedatnan di S. Theodora bèk sin pèrmit di OM, pasobra esaki no ta konforme e ‘Wetboek van Strafrecht BES’.
Banda di esaki nos ke hala atenshon di un i tur, ku tin un prosedura di keho pa tur hende ku ta malkontentu ku kualke servisio di Kuerpo Polisial Hulanda Karibense i òf un kolaboradó. Tur hende ta bonbiní pa pidi un formulario di keho na un di nos wardanan di polis na Hulanda Karibense, yena e formulario i entreg’é. Ta manda e formularionan di keho pa nos Departamentu di Asuntunan Interno (Bureau Interne Zaken – BIZ) pa tratam. Asina ku a investigá e kaso profundamente, e persona ku a entregá keho ta haña un mensahe tokante finalisashon di su keho i e resultado di esaki.
Manera nos hefe di kuerpo, Alwyn Braaf, a indiká den e último rueda di prensa, nos ta drùk bezig pa hasi e prosedura aki digitalmente disponibel. Ku esaki nos ta spera di a minimalisá e barera pa komunidat entregá keho na polis.
Ta apresiá i balorá enormemente e ‘feedback’ di komunidat.
Ta esensial pa nos sa kon nos por mehorá i salbaguardiá nos servisionan. Boso remarke, sugerensia i keho ta yuda nos pa evaluá i adaptá nos prosesonan, pa asina por garantisá kalidat i integridat di nos servisionan.
.png)
コメント