Segun Arthur Sealy; Na Boneiru Na e Momentunan Aki, Tin Feria di Grabbelton.

Segun Arthur Sealy ta trese dilanti den su komunikado pa e siman aki; "Na Boneiru na e momentunan aki tin feria di grabbelton.

Segun Sealy, ántes tabata organisá feria den kurá di skol di frater òf di sùr pa rekoudá fondo. Por a pasa na diferente huki unda por a kumpra lòt pa gana un Ber, Makaku,òf kualke Pòpchi i ko’i hunga, pasa na wil di suerte, tira bala basha bleki abou, kareda di kabai riba un bòrchi, purba suerte na schuiftafel i grabbelton, paga florin pa un sèt di baile di tres piesa, bishitá un miradó di destino i kumpra limonada bòter pretu.

Awendia tin un otro feria ta tumando lugá na Bonaire, pero ku un solo aktividat ku yama grabbelton.

Ta grabel pa mas kapital pa miembro di frakshon,

Ta grabel den email,

Kolegio Ehekutivo ke grabel pa mas salario,

Ke grabel den servisio di impuesto,

Ke grabel den hasi fiansa na banko,

Ke grabel den kompanianan ku nunka a paga impuesto di aeropuerto,

Ke grabel den impuesto di entrada,

Ke grabel den fondo pa konmemorashon di abolishon di sklabitut,

Ke grabel i shòbel ken ta bira gezaghèber,

Ke grabel i shòbel den Selibon pa un gerente nobo,

Ke grabel den industria di turismo,

Ke grabel den Fundashon Wega di Number.

Danki Dios ku no por grabel ni shòbel den Fundashon Mariadal, enseñansa, WEB, TELBO i Federashon Futbòl Boneriano.

E kultura di grabbelton ta dañino p'e pueblo di tera di solo i suave bientu, humilde i semper kontentu sperando den Dios ku si no tin feria.

Kunukero, piskadó, hubentut, grandinan, akohida di mucha, medio ambiente, sentronan di bario i kultura ta sangrando.

Unda e programa ta pa tur hende por mira ki sorto di komunidat nos ke traha ariba, unda ta reina siguridat, pas, alegria, amor, empleo i inklusividat.

Ta kultura di grabbelton ta na vigor.

Pasku di resurekshon su lès tristu ta ku a traishoná i nenga pueblo.

Arthur Sealy