Silvana Janga- Serfilia Ta Bai Asumí e Puesto Di Sekretario Insular Athunto. Gerold Van Elshuis Temporalmente Komo Direktor Interino di Komunidat i Kuido

Kolegio Ehekutivo di Entidat Públiko Boneiru ta kontentu di por anunsiá nombrashon di Gerold van Elshuis komo direktor interino di Komunidat i Kuido.

Temporalmente e ta tuma e funshon for di Silvana Janga-Serfilia, kende ta asumí un desafio nobo dentro di nos organisashon komo Sekretario Insular athunto.

Ya pa diesdos aña Gerold van Elshuis ta un kara konosí den gobièrnu di Goneiru.

El a kuminsá su karera na komo konsehero di maneho na departamento di Personal i Organisashon i for di luna di mart 2022 e ta trahando na direktorado di Komunidat i Kuido komo sekretario di direktorado. Den e ròl akí el a okupá su mes prinsipalmente ku tareanan di maneho empresarial i dunamentu di sosten na e direktor.

Den su ròl nobo komo direktor interino, durante e lunanan binidero Gerold ta bai enfoká riba desaroyo di e direktorado den direkshon di un direktorado di programa i riba fortifikashon di e koherensia interno dentro di gobièrnu.

E ta bai traha huntu ku partnernan lokal i Reino pa konbertí programanan manera Traha riba Progreso i Bienestar, e programa atministrativo 2023-2027 i e akuerdo atministrativo 2024-2027 den medidanan i aktividatnan konkreto, visibel i tangibel pa komunidat boneriano. Tambe e ke fortifiká e direktorado su forsa di ehekushon pa medio di stimulá formashon di maneho partisipativo i enbolbimentu di suidadanonan ku desaroyo di maneho i ehekushon.

Kolegio Ehekutivo tin tur konfiansa den liderazgo di sr Van Elshuis i su kapasidat pa kontinuá ku e bon rumbo di e direktorado. Kolegio Ehekutivo ta gradisí Silvana Janga-Serfilia pa su dedikashon inkansabel, ku kua el a alsa direktorado di Komunidat i Kuido na  un nivel haltu, di manera ku esaki por desempeñá su tarea adekuadamente na bienestar di habitantenan di Boneiru.

Ku gran antisipashon Kolegio Ehekutivo ta wak dilanti den direkshon di e periodo di stabilidat i plaser den trabou ku e liderazgo di sr Van Elshuis lo trese.

Su ekspertisio i vishon ta di balor inkalkulabel pa kontinuashon di nos mishon pa mehorá kalidat di bida di Boneiru su habitantenan. Kolegio Ehekutivo ta alegrá nos mes tokante e kambionan positivo ku ta bai tuma lugá bou di su guia.