Te ku 2027 e fundashon WeConnect ta haña supsidio anualmente pa e sosten na studiante karibense i persona ku ta kuminsá riba merkado laboral (starter). Na 2023 ta trata di un montante di mas o ménos 200.000 euro. Hulanda ta pone e montante aki na disposishon via e ministerio di Asuntunan Interior i Relashonnan den Reino, pa asina yuda studiante i starter pa kuminsá riba merkado laboral den parti Karibense di Reino despues ku e a finalisá su estudio. Esaki ta nesesario pa motibu ku tin un nesesidat grandi pa profeshonal na e islanan.
Studiante di parti Karibense di Reino ta enfrentá retonan grandi, tantu sosial, finansiero komo kultural. Despues di su estudio persona di Karibe ku a finalisá su estudio i ku ta kuminsá riba merkado laboral, hopi biaha ta keda traha na Hulanda. Hopi bia esaki ta mas atraktivo, entre otro pa motibu ku e salario na parti Karibense ta relativamente abou, miéntras e starter hopi biaha a akumulá un debe di estudio haltu.
Ademas, hopi biaha ta difísil pa dunadó di trabou i potensial trahadó haña otro pa debí na e distansia entre Hulanda Oropeo i e parti Karibense. Pa tal motibu hopi bes e starter tin difikultat pa drenta merkado laboral Karibense.
Esaki ta un kousa importante pa e problemanan di kapasidat ku e gobièrnunan den parti Karibense di Reino ta enfrentá.
Segun Sekretario di Estado di Relashonnan den Reino, Alexandra van Huffelen: “Ta importante pa nos tin atenshon pa e grupo aki di studiante i starter. Pa su propio futuro, pero tambe pa fortifiká e islanan. Durante mi bishitanan na e islanan mi a mira ku e gobièrnunan tin un nesesidat grandi di profeshonal. Pa esei nos ke hasi mas atraktivo pa hende bai bèk i sirbi su isla natal.”
Fundashon WeConnect tin komo meta pa konektá Karibe ku Hulanda Oropeo via entre otro proyekto edukativo. E ta dediká na mehorashon di e éksito di estudio i bienestar di e studiantenan Karibense na Hulanda. E ta hasi esaki entre otro ofresiendo un nètwèrk, duna treinen di presupuesto, tene enkuentro i duna informashon na skolnan den Karibe.
Tambe e fundashon ta stimulá starter pa drenta merkado laboral den Karibe i asina fortifiká e kapasidat atministrativo di e islanan den parti Karibense di Reino.
===========================================
BròKèS 93.5 ………… Skuch’é!
.png)
Comments