Tourism Corporation Bonaire (TCB) ta kontentu di por anunsiá un Memorandum of Understanding (MOU) ku el a firma ku un grupo diverso di persona eksepshonal, kaminda kada un di nan ta un ‘Profeshonal Lokal’ ku a haña rekonosementu komo embahador lokal di Boneiru. E kolaborashon akí ta marka un logro importante den promoshon di Boneiru su identidat, kultura i bunitesa úniko.
E akuerdo ku nan a firma ta nifiká un kolaborashon duradero riba término largu, ku enfoke riba duna publisidat na Boneiru su bunitesa pa medio di diferente inisiativa, evento, proyekto, kompetensia i e pashon sinsero ku e profeshonalnan akí tin pa nan isla.
Na aña 2022 ku orguyo Boneiru a bira parti di e MOU akí ku un aliniashon di talentonan lokal eksepshonal ku a pone nan stèmpel riba tantu nivel nashonal komo internashonal. Kada un di e personanan akí ta aportá ku su propio kombinashon di abilidat distinto i un kompromiso kompartí pa mustra mundu e enkanto i atraktividat di Boneiru.
Akí bou ta sigui un bista general kòrtiku di e personanan akí ku ta destaká i ku ta forma parti di e kolaborashon:
Elton Taty Frans – windsurfer profeshonal
Elton Taty Frans a lanta na laman i na edat hóben kaba el a desaroyá un pashon pa windsurf. Su karera komo windsurfer profeshonal ta keda karakteristiká pa un seri di prestashon, entre otro hopi viktoria i klasifikashonnan haltu den eventonan rònt mundu.
Youp Schmit – windsurfer profeshonal
Youp Schmit a hasi su debut komo windsurfer profeshonal na aña 2010 i for di e tempu ei el a logra prestashonnan remarkabel, entre otro kampion mundial Freestyle PWA Youth na aña 2011 i 2012. Konstantemente e ta den tòp 10 di PWA world tour.
Alvinson Soliana – atleta profeshonal
E karera di Alvinson Soliana ta un di dedikashon na fitness i bodybuilding. El a deskubrí su amor pa fitness na edat di 20 aña i esaki a transformá su bida. Esaki a bira un estilo di bida i un pashon ku ta dun’é e impulso pa logra su metanan.
Sabi Saragoza – motosiklista profeshonal
Na edat hóben Sabi Saragoza a kuminsá kore motosaikel i el a krese bira un motosiklista profeshonal ku ta konosí pa su shownan i presentashonnan impreshonante. Pa medio di su abilidat el a haña rekonosementu, hopi premio i un grupo konsiderabel di siguidó online.
Ermaisha Martinus – Embahador i strea hóben multitalentoso
Ermaisha Martinus ta un hóben multitalentoso ku a logra éksitonan signifikante riba diferente tereno, for di gana títulonan karnavalesko te destaká den literatura i kultura. Su aporte ta reflehá su enbolbimentu ku e patrimonio bibitu di Boneiru.
Maurison Martinus – koredó di BMX profeshonal
Maurison Martinus, konosí tambe komo MauBikeLife, ta un kampion karibense komo koredó di BMX i spesialista den akrobasia riba ATV. Su prestashonnan i su presensia online a sòru pa e tin un grupo dediká di siguidó i a hasi posibel ku e por inspirá e siguiente generashon.
Amado Vrieswijk
E karera di windsurf di Amado Vrieswijk a kuminsá na momentu ku el a bai wak King of the Caribbean Windsurf World Cup na aña 2002. Rápidamente el a establesé su nòmber riba tereno di windsurf, el a para riba hopi podio i el a logra títulonan ku ta suprayá su talento eksepshonal.
Miles Mercera, direktor di TCB, a ekspresá su entusiasmo di e siguiente manera: ‘E kolaborashon akí ta simbolisá e unidat i resiliensia di Boneiru. Nos Profeshonalnan Lokal ta representá alma i kurason di nos isla, i pa medio di e kolaborashon akí nos ta mustra e espíritu ku ta hasi Boneiru berdaderamente eksepshonal.’
E kolaborashon entre TCB i e profeshonalnan remarkabel akí ta nifiká un dedikashon kompartí pa mustra mundu Boneiru su kultura, deporte i talento úniko. Huntu nan meta ta pa aportá na kresementu i reputashon di nos isla riba esenario internashonal.
BròKèS 93.5 ………… Skuch’é!
.png)
Comments