Manera ya ta konosí e isla di Boneiru a keda afektá pa un interupshon total di e suministro di koriente debí na un fayo tékniko rònt di 3:00 di atardi riba djaweps 24 di Novèmber.
Despues di a restourá e suministro di elektrisidat pa e isla, e téknikonan di Water – en Energiebedrijf Bonaire ( WEB) i Contour Global Bonaire
(CGB) a sigui traha huntu pa yega na e orígen di e suseso inoportuno aki.
E proseso pa buska e kousa di e problema ta andando ainda. Pa e motibu aki e situashon di suministro di koriente ta sigui delikado te na momentu ku logra identifiká i atendé ku e kousa (nan). Un investigashon adekuá i profundo ta di hopi importansia pa tur esnan involukrá.
Esaki ta e motibu dikon WEB I CGB a inisiá un komishon di investigashon huntu pa analisá e insidente i presentá rekomendashonnan ku e meta pa salbaguardiá e konfiabilidat di e suministro di koriente.
E komishon aki ta keda formá pa 4 spesialista di CGB , 6 spesialista di WEB i un eksperto independiente. E komishon ta spera di presentá su informe den 2 pa 3 siman. Na su debido tempu, WEB i CGB lo duna e komunidat di Boneiru un aktualisashon di e kousanan fundamental i e rekomendashonnan pa ku e suseso di dia 24 di Novèmber.
Den pasado , formashon di un komishon di investigashon di WEB huntu ku CGB a logra yega na identifiká e kousa (nan) fundamental i yega na e rekomendashonnan nesesario.
WEB I CGB un biaha mas ta pidi nan diskulpa pa kualkier inkonbeniensia ku e interupshon aki por a kousa I ta sigurá komunidat di Boneiru ku nan ta hasiendo tur posibel pa evitá ku esaki por ripití. WEB i CGB lo sigui mantené komunidat informá.
=========================================== BròKèS 93.5 ………… Skuch’é! https://www.radio935bonaire.com http://radio.garden/listen/bro-ke-s-93-5-fm-boneiru/a1YG6S77 https://www.basilachill.com/#!radio/radiobrokes http://brokes935fm.radiostream123.com https://liveonlineradio.net/radio-brokes-935-Radio
.png)
Comentarios